Teatre de Max Roqueta

Paregut en junh de 2020

L’edicion de cinc pèças de teatre de Max Roqueta permetrà als amators de literatura occitana de legir una part essenciala de son òbra.

De la pastorala umanista (La Pastorala dels volurs) als jòcs de l’amor e de la vida dins la ciutat de Venècia (La Podra d’embòrnia), dels cants de reis e de trobadors dins un oratorio qu’espèra encara lo creator de sa musica (Canta-Loba) a una fantasiá poetica e magica, batèsta entre poder e amor (La Ròsa bengalina), fins a una reflexion tragica suls camins de l’existéncia (La Gruma e la Sau), descobrissèm tota la diversitat de son teatre.

Aqueste ramelet de mots, de personatges, de sentiments que nos pertòcan al pus prigond, desvela l’importància màger de l’escritura teatrala de Max Roqueta.


Actualitat

Paraulas d’ausèls e d’autras bèstias

Los ausèls, los cal saber escotar per comprendre lor lengatge. Maria Odila Dumeaux vos balha aicí las claus per descobrir çò que dison los ausèls de l’òrt, del campèstre o del bòsc. Tot un monde meravilhós de bèstias e de causas que parlan, devisan e cantan en bona lenga d’òc dins d’istorietas, de mimologismes, de contes e de comptinas ligadas, escritas e legidas per M. O. Dumeaux. I trobaretz lo rossinhòl, la peput, la besenga, lo reipetit, l’agaça, l’agla, lo cocut o l’auriòu… mas tanben l’ase, lo piòt, la cigala o lo carriòl… E comprendretz plan milhor las lengas de las bèstias !

Un Cd (amb los tèxtes occitans e francés en pdf)